14 ақпанда өткен мәжіліс отырысында депутат Руслан Берденов көлеңкелі экономика, шағын және орта бизнес туралы сөз қозғап, депутат сауалын жолдады. Депутаттың айтуынша, көлеңкелі экономикаға қарсы шаралардың нәтижесінде кейінгі 3 жылда бюджетке 2 трлн теңге түскен. Ал елдегі шағын және орта бизнестің ЖІӨ үлесі 36%-ке жеткен. Аталған деректерді Factcheck.kz тексеріп көрді.
Мәлімдеме: Мысалы, көлеңкелі экономикаға қарсы шаралардың нәтижесінде соңғы 3 жылда бюджетке қосымша 2 трлн теңге түскенін білесіздер.
Руслан Берденов, мәжіліс депутаты
Үкім: Шындық
ҚР Қаржы экс-министрінің айтуынша, кейінгі 3 жылда (2020-2022 жылдар) көлеңкелі экономикаға қарсы жасалған шаралар барысында бюджетке 2 трлн теңге қаржы түскен. Ал көлеңкелі экономиканың ЖІӨ үлесі 2022 жылдың қорытындысы бойынша 18,3% болды.
Мәлімдеме: Еліміздегі шағын және орта бизнестің жалпы ішкі өнімдегі үлесі 36%, ал дамыған елдерде 60%-ға дейін барады.
Руслан Берденов, мәжіліс депутаты
Үкім: Шындық
ҚР Ұлттық статистика бюросының 2023 жылдың қаңтар-қыркүйегіндегі дерегіне сай, шағын және орта бизнестің ЖІӨ үлесі 36,5%-ке жетті. Ал Дүниежүзілік сауда ұйымының мәліметінше, дамыған елдерде бұл көрсеткіш 55% шамасында.