Биыл интернетте Ніл өзенінің суы қызыл болып кеткені туралы ақпарат тарады. Тіпті оны дәлелдейтін видео тарап жүр деседі. “Проверено” фактчекерлері өзенге қатысты ақпаратты және роликті тексерді.
Ніл өзенінің қып-қызыл болып тұрған видеосы Tiktok-та, Facebook-та, Youtube-та, Instagram-да жарияланды.
20 секундқа созылған кадрда ондағы өзеннің Мысырдағы Ніл екенін дәлелдейтін белгісі жоқ. Мысырдың тұрғындары мен туристері де қызылға боялған Нілдің басқа видеоларын желіге салмаған. Оның үстіне, Instagram-да Нілдің қызыл емес, әдеттегі түстегі фото мен видеосы көп. Оған қоса фактчекерлер бірде-бір беделді басылымнан Ніл суының қызыл боп кеткені туралы ақпарат таппады.
Ал судың қызыл, күлгін түске айналуы — ғылыми тұрғыдан нақты түсіндірілетін құбылыс. Бірақ адамдар мұндай өзен-суды көргенде оны ақыр заманмен байланыстырып кетеді. Мысалы, 2014 жылы Испанияның солтүстік-батысындағы бір ауылдағы субұрқақтың суы қып-қызыл болып кеткен. Мұны көрген тұрғындар шошыған-ды. Дегенмен нәтижесінде субұрқаққа жай ғана қып-қызыл кішкентай балдырлар түсіп кеткені белгілі болды.
Сонымен қатар Чилиде Лагуна-Роха деген өзен бар. Оның суының түсі — күлгін-қызыл. Кейбір мәлімет бойынша, оның да себебі — балдырдар. Айтпақшы, көпшілік арасында тараған видеодағы өзеннің жан-жағындағы пейзаж осы Лагуна-Роханыкіне қатты ұқсайды.
Осылайша, Ніл өзенінің суы қызылға боялғанын растайтын нақты ақпарат жоқ. Ал тараған видеода Ніл емес, Лагуна-Роха өзені бейнеленген.
