Жақында қазақстандық медиада Қазақстан тұрғындары азық-түлікке қанша ақша жұмсайтыны туралы ақпарат тарады (1, 2, 3, 4, 5). Уеб-сайттардың Picodi.com ресурсына сілтеп жазуынша, қазақстандықтар жалақысының 49%-не азық сатып алады. Ақпарат қаншалықты рас екенін тексердік.
Мәлімдеме: Қазақстандықтар табысының 49%-ін азық-түлікке жұмсайды.
Желіде тараған ақпарат
Үкім: Шындық
Қазақстандықтар айлық табысының жартысын азық-түлікке жұмсайтыны рас, мұны түрлі статистикалық көрсеткіштер дәлелдейді. Мысалы, АҚШ-тың Ауыл шаруашылығы министрлігінің дерегіне сай, 2021 жылы қазақстандықтар табысының 49,4%-ін, Қзақстанның ұлттық статистика бюросының дерегінше, 2022 жылы қазақстандықтар табысының 51,1%-ін азық-түлікке жұмсаған. Тіпті Еуропа елдерін салыстырған “РИА Новости” рейтиңінде еліміз ең соңғы — 39-орында. Мұнда қазақстандықтар табысының 53%-ін азық-түлікке жұмсайтыны айтылған.
Picodi.com сайтындағы ақпарат сай, Қазақстан 105 елдің арасында 99-орында орналасқан. Picodi журналистері рейтиңді жергілікті статистика бюросы мен Euromonitor (Лондондағы зерттеу компаниясы) дерегіне негіздеп құрастырған. Оның ішінде, үйде тұтынылатын азық-түлік пен алкогольсіз сусындарға арналған кейінгі деректер қолданылған.