8 желтоқсанда өткен сенаттың жалпы отырысында депутат Ғалиасқар Сарыбаев Қазақстандағы интернет пен телекоммуникация инфрақұрылымы туралы мәселе қозғап, бірнеше дерек келтірді.
Factcheck.kz сенатор сөзінің қаншалықты рас екенін тексерді.
Мәлімдеме: Телекоммуникация инфрақұрылымының индексі бойынша Қазақстан 3 позицияға төмендеп 64-орынға түссе, киберқауіпсіздіктің жаһандық индексі бойынша 40-орында.
Сарыбаев Ғалиасқар
Үкім: Манипуляция
Біріккен Ұлттар Ұйымының Ақпараттық және коммуникациялық технологиялар жөніндегі мамандандырылған мекемесі — Халықаралық телекоммуникация одағының ақпаратына сай, 2020 жылғы киберқауіпсіздіктің жаһандық индексі есебінде Қазақстан 93.15 баллмен 31-орынға тоқтаған. Депутаттың 40-орын туралы ақпараты 2018 жылғы есепке негізделген, яғни ескірген дерек.
Осы БҰҰ-ның 2022 жылғы Электронды үкімет индексінің субиндексі саналатын телекоммуникация инфрақұрылымының көрсеткішінде Қазақстан 0.7520 баллмен 65-орында тұр.
Мәлімдеме: Соңғы екі жылда елімізде интернет пайдаланушылар 7,04 %-ке, мобильді интернеттің абоненттер саны – 14,44%-ке өссе, кең жолақты интернет инфрақұрылымы бар болғаны 0,87%-ке өскен.
Сарыбаев Ғалиасқар
Үкім: Шындыққа жақын
Ұлттық статистика бюросының ақпаратына сай, 6-74 жас аралығында Интернет желісін пайдаланушылардың үлесі 2020-2021 жылдары 88,2%-тен 92,9%-ке, яғни 4,7%-ке өскен. Ал Интернет желісіне қатынауы бар ұялы байланыс абоненттерінің саны сол уақытта 2,29%-ке, яғни 18 651 100-ден 19 079 700-ге көбейген. БҰҰ-ның рейтиңіне сай, бұл уақытта телекоммуникация инфрақұрылымының индексі 0.7024-тен 0.7520-ға, яғни 7%-ке өскен.
Мәлімдеме: Елімізде 100 адамның 15-і тұрақты Интернетке тіркелсе, ауылдық жерлерде желімен 100 адамның тек 8-і ғана қамтамасыз етілген
Сарыбаев Ғалиасқар
Үкім: Шындыққа жақын
Ұлттық статистика бюросының ақпаратына сай, 2021 жылы елімізде 100 адамға шаққандағы Интернет абоненттерінің тығыздығы 15 адам, ал ауылда 100 тұрғынға шаққандағы тіркелген желі саны 9,3 болған.
