11 қазанда өткен Үкімет отырысында Еңбек және халықты әлеуметтік қорғау министрі Тамара Дүйсенова еліміздегі жұмыс күшіне қатысты бірнеше дерек келтірген. Factcheck.kz оның айтқан сөзі қаншалықты рас екенін тексерді.
Мәлімдеме: 2016-2020 жылдары жұмыс күші жылына орта есеппен 36,4 мың адамға өссе, бұл көрсеткіш былтыр 2 есе өсіп, 76 мыңға жетті.
Тамара Дүйсенова
Үкім: Шындық
Ұлттық статистика бюросының ақпаратына сай, 2016-2020 жылдар арасында жұмыс күші түрлі мәнде өсіп-азайып отырған — 5 жылдың орта мәні 36,5 мың адам екені рас. Ал 2021 жылы 2020 жылға қарағанда 75,9 мың адамға өскен.
Мәлімдеме: Оларды жұмыспен қамту мәселесіне келсек, аталған кезеңде жалдамалы жұмыскерлер саны 68,8 мың адамнан 23,5 мың адамға дейін азайды.
Тамара Дүйсенова
Үкім: Жалған
Министр нені меңзегені белгісіз, алайда Ұлттық статистика бюросының ақпаратына сай, жалдамалы қызметкерлер саны 2016 жылдан 2021 жылға дейін тоқтаусыз өсіп отырған.
Мәлімдеме: 2000 жылдардан бастап дүниеге келген балалардың саны артты. Сол балаларымыз ержетіп, қазір еңбек нарығына қосылуда. Сол себепті, алдыңғы жылдары біртіндеп азайып келе жатқан өзін-өзі жұмыспен қамтығандар саны қайтадан өсіп, 51 мың адамға көбейді.
Тамара Дүйсенова
Үкім: Шындық
Ұлттық статистика бюросының ақпаратына сай, расымен кейінгі жылдары өзін-өзі жұмыспен қамтығандар саны төмендеп, тек 2021 жылы 2020 жылға қарағанда 51,5 мың адамға артқан.