Оңтүстік Корея президенті Юн Сок Ель қызметінен шеттетілді. Конституциялық сот парламенттің импичмент туралы өтінішін қолдады. Бұл туралы «Власть» басылымы Reuters агенттігіне сілтеме жасап хабарлады.
Басты судьяның міндетін атқарушы Мун Хен Бэнің айтуынша, Юн Сок Ель 2024 жылғы 3 желтоқсанда соғыс жағдайын енгізіп, өкілеттігін асыра пайдаланған. Судьяның сөзінше, бұл шешім елдің саяси, экономикалық және сыртқы қатынастарында үлкен бейберекет тудырды.
Сот президент әскери жағдайды оппозициялық партияның әрекетіне қарсы жауап ретінде жариялады деген уәжді қабылдамады.Судьяның пікірінше, мұндай қайшылықтарды шешудің заңды жолдары бар. Ал соғыс жағдайын енгізу – негізсіз әрі қате шешім. Президенттің әскерді парламентке қарсы жұмсауы биліктің тәуелсіздігін қорғау жөніндегі конституциялық міндетін өрескел бұзу боп саналды.
Заңға сәйкес, президент қызметінен шеттетілгеннен кейін 60 күн ішінде жаңа президент сайлануы керек. Жаңа президент ант бергенге дейін елді премьер-министр Хан Док Су уақытша басқарады. Ал осы уақытта 64 жастағы Юн Сок Ельге қылмыстық тергеу жүргізіледі.
Контекст
Президент Юн Сок Ель 3 желтоқсанда кейінгі 45 жылда алғаш рет «соғыс жағдайын» енгізді. Юнның сөзінше, бұл елге қауіп төндіретін, конституциялық тәртіпке нұқсан келтіретін «мемлекетке қарсы күштермен» күресуге бағытталған.
Ал Оңтүстік Кореяның басты оппозициясы Демократиялық партия президенттің бұл шешімін «мемлекеттік төңкеріс» деп атап, бұйрықты дереу жоюды талап етті. Ұлттық Ассамблея бұйрыққа қарсы дауыс беріп, парламент ғимаратында наразылықтар басталды. Бірнеше сағаттан соң Оңтүстік Корея президенті әскери жағдайды алып тастайтынын мәлімдеді. Оңтүстік Корея парламенті 14 желтоқсанда Юнды президент қызметінен шеттеті.
Юн Сок Ель 15 қаңтарда тұтқындалды. Оған бұрынғы қорғаныс министрі және өзге де лауазымды тұлғалармен келісіп, «қарулы қақтығыс немесе төтенше жағдай болмаған кезде заңсыз соғыс жағдайын жариялады» деп айыпталды. Тергеу деректеріне қарағанда, Юн Сок Ель соғыс жағдайына қарсы дауыс бермес үшін парламентке әскер жіберген.
Басты беттегі сурет Reuters агенттігінен алынды.
