АҚШ-тың Мэриленд штатының федералдық соты Илон Маск пен Мемлекет тиімділігі департаментіне (DOGE) USAID агенттігін таратуға уақытша тыйым салды. Ақ үй бұл шешімге қарсылық білдірмек. Бұл туралы The Washington Post хабарлады.
18 наурызда судья Теодор Чуанг Трамп әкімшілігі Мемлекет тиімділігі департаментіне гранттарды жою және USAID-ті тарату құқығын беру арқылы Конституцияны бұзған болуы мүмкін деді. Судьяның айтуынша, агенттіктің тағдырын Ақ үй емес, Конгресс шешуге тиіс.
Алдын ала сот шешіміне сәйкес, DOGE USAID-тің мыңдаған қызметкерінің электрон поштасы мен басқа да желісін қалпына келтіруге міндетті. Олардың қатарында қауіпті аймақтарда жұмыс істейтіндер де бар. Судья USAID қызметкерлерінің жеке ақпаратын агенттік шегінен тыс жариялауға тыйым салды әрі USAID-қа қатысты кез келген нәрсе агенттіктің заңды қызметкерінің рұқсатымен жүзеге асырылуы керек деді.
Мемлекеттік демократияны қорғау қоры арызды USAID-тің жиырмадан аса қызметкерінің атынан берді. Олар сот құжаттарында «Дж. Доу 1-26» деп көрсетілген.
Теодор Чуангтың қаулысы соттың келесі шешіміне дейін күшінде қалады. Трамп әкімшілігі бұған апелляция беретінін мәлімдеді. Илон Маск басқаратын DOGE Трамптың мемлекеттік шығындарды қысқарту туралы жарлығы үшін құрылғанын еске салайық. Маск USAID-ті тиімсіз деп атап, оны жабу туралы ұсыныс жасаған.
Контекст
20 қаңтарда Трамп USAID арқылы жүзеге асырылатын барлық көмекті уақытша тоқтату туралы жарлыққа қол қойды. Трамп әкімшілігі бұл шара 90 күнге созылатынын мәлімдеді. Осы уақыт ішінде Вашингтондағы жаңа әкімшілік гуманитарлық көмектің АҚШ-тың саяси мақсаттарына сәйкестігін қайта қарауға тиіс еді. Наурызда АҚШ мемлекеттік хатшысы Марко Рубио USAID бағдарламаларының 83%-ы жабылғанын хабарлады. Агенттік қызметкерлері жұмыстан шығарылып, көбі шетелде қолдаусыз қалды. Одан бөлек, агенттіктің штаб-пәтері жабылып қалды.
