Мамырдың аяғында өткен мәжіліс отырысында депутат Әділ Жұбанов Атырау облысы жайында деректер келтіріп, сауал жолдады. Нақтырақ айтсақ, Атырау облысы ірі донор ретінде Ұлттық қордың 60%-ін, республикалық бюджеттің 30%-ін толтырып, мемлекет қазынасын қампайтып отыр. Ал облысқа берілетін нысаналы даму трансферттері бойынша 12-орында тұр. Депутат келтірген деректерді Factcheck.kz тексеріп көрді.
Атырау облысы Ұлттық қордың 60%-ін беріп мемлекеттік қазынаны толықтырып келеді.
Әділ Жұбанов, мәжіліс депутаты
Үкім: Шындық
ҚР Қаржы министрлігінің мәліметінше, 2022 жылы Ұлттық қорға түскен кірістің 56,6%-і Атырау облысына тиесілі. Одан кейін БҚО 21,7% және Маңғыстау 14% Ұлттық қорды толықтырып отыр. Ал кейінгі 6 жылдықта Атыраудың үлесі бір өсіп, бір кеміп отырған.
Осы Атырау облысы республикалық бюджеттің 30%-ін берді.
Әділ Жұбанов, мәжіліс депутаты
Үкім: Шындыққа жақын
ҚР Қаржы министрлігінің дерегінше, 2022 жылы Атырау облысынан республикалық бюджетке түскен кіріс көлемі 17,1%-ке жеткен. Кіріс бойынша ең көп 28,3% Алматы қаласына тиесілі, ал Астана 13,8%-ке жеткен. Атырау облысы кейінгі 6 жылдықта республикалық бюджетке ең көп 20,1%-і 2019 жылы толықтырған.
Атырау облысы жергілікті бюджет есебінен бюджеттік алымдар беру бойынша 1-орында, ал облысқа берілетін нысаналы даму трансферттері бойынша 12-орында
Әділ Жұбанов, мәжіліс депутаты
Үкім: Шындық
ҚР Қаржы министрлігінің ақпаратына сай, 2022 жылы жергілікті бюджет есебінен республикалық бюджетке алымдар беру бойынша Атырау облысы 1-орында тұр, яғни 220 млрд теңге көлемінде қаржы алынған. Ал облысқа берілетін нысаналы даму трансферттері бойынша 6-орында тұр. Облысқа 57 млрд теңге бөлінген. Трансферт бойынша ең көп 140 млрд теңге Түркістан облысына, 138 млрд Астанаға және 74 млрд Шымкентке бөлінген.
