12 маусымда өткен мәжіліс отырысында депутат Наурыз Сайлаубай еліміздегі білім саласындағы жемқорлық мәселесін көтеріп, сауал жолдады. Депутаттың айтуынша, 2023 жылы 192 қылмыстық іс қозғалып, 13 млрд теңге жымқырылған. Сондай-ақ, Жетісу, Қызылорда, Түркістан облысы мен Алматы қаласында жемқорлық фактісі көп тіркелген. Аталған деректерді Factcheck.kz тексеріп көрді.
Мәлімдеме: 2023 жылы осы жемқорлықтың кесірінен 192 қылмыстық іс қозғалып, 13 миллиард теңге жымқырылған.
Наурыз Сайлаубай, мәжіліс депутаты
Үкім: Шындық
ҚР Сыбайлас жемқорлыққа қарсы іс-қимыл агенттігінің ақпаратына сай, 2023 жылы білім беру саласында барлы 192 қылмыстық іс тіркелген. Келтірілген шығын көлемі – 13 млрд теңгеден асты.
Ал жалпы Qamqor.gov.kz дерегінше, 2023 жылы елімізде сыбайлас жемқорлыққа қатысты 1692 қылмыстық іс тіркеліп, 51 млрд теңге шығын келтірілген.
Мәлімдеме: Ірі жымқырулар Жетісу, Қызылорда, Түркістан облыстары мен Алматы қаласында орын алды.
Наурыз Сайлаубай, мәжіліс депутаты
Үкім: Шындық
ҚР Сыбайлас жемқорлыққа қарсы іс-қимыл агенттігінің дерегіне сай, 2023 жылы білім саласы бойынша ең ірі жымқырулар Түркістан, Жетісу, Қызылорда және Ақтөбе облыстары мен Алматы қаласында тіркелген.
