Қырғызстанның әділет министрлігі тұрмыста зорлық-зомбылық көрсететіндерге арнайы электрон білезік тағуды жоспарлап отыр. Бұл туралы Азаттықтың Қырғыз қызметі хабарлады.
Министрлік бұл әдіс отбасындағы, тұрмыстағы зорлық-зомбылықты азайтуға көмектесетінін айтады. Өйткені электрон білезік агрессорды құрбанның маңайына жақындатпай, радиусын шектеп отырады.
Қырғызстан билігінің сөзінше, мұндай әдісті Түркия қолданып, тұрмыстағы зорлық-зомбылықтың көп мәселесін шешкен.
Қазір ведомство электрон білезікті сынап жатыр. Заң қабылданса, бұл құрылғы қылмыстық-атқару өндірісінде 2024 жылдан бастап қолданылады.
Айта кетері, WPS (әйелдер қауіпсіздігі бойынша индекс) рейтиңі бойынша, Қырғызстан екі жыл қатарынан Орталық Азиядағы елдер ішінде әйелдерге ең қауіпті елдің бірі болып саналған.
