Вашингтондағы округтік судья Амир Али 13 ақпанда Трамп әкімшілігінің бүкіл әлемге гуманитарлық көмекті тоқтату туралы шешімін уақытша алып тастауды бұйырды. Бұл туралы Associated Press хабарлады.
Судья қаржыландыруды кенеттен тоқтату үкіметтік емес ұйымдарға және АҚШ-тың халықаралық көмегін жүзеге асыратын серіктестерге елеулі зиян келтіргенін айтты.
Уақытша тыйымға СПИД-ке қарсы вакцинаны қолдау коалициясы (AVAC) және Жаһандық денсаулық сақтау кеңесі (GHC) берген шағым себеп болып отыр. Бұл ұйымдар АҚШ қаржыландыратын денсаулық сақтау жобаларын жүзеге асыратын медициналық мекемелердің мүддесін қамтиды.
Трамп әкімшілігі USAID арқылы қаржыландырылатын мыңдаған шетелге көмек бағдарламасын 90 күнге тоқтатып, оларды жан-жақты талдаудан өткізіп, қайсысы жабылуы керегін анықтайтынын мәлімдеген. Алайда Амир Алидің сөзінше, үкімет қаржыландыруды тоқтату неліктен талдау жасаудың алғашқы қадамы екенін түсіндіре алмаған.
Сот шешімі Трамптың 20 қаңтарда шетелдік көмекті тоқтату туралы жарлығына дейін жасалған келісімшарттарға қатысты.
Сонымен қатар, судья денсаулық сақтау ұйымдарының Трамптың жарлығын конституцияға қайшы деп тану туралы талабын қанағаттандырмады. Ол тек мемлекеттік хатшы Марко Рубио мен басқа да лауазымды тұлғаларға жарлықты орындауға уақытша тыйым салды.
Өткен аптада округтік судья Карл Николс USAID-тің мыңдаған қызметкерін жұмыстан босату жоспарын уақытша тоқтатқан. Бұл жоспар бойынша, шетелде жұмыс істейтін мамандар мемлекеттік қаржы есебінен 30 күн ішінде АҚШ-қа қайтуы керек еді.
Тыйым 13 ақпан күні аяқталуға тиіс. Алайда Николс жоспардың қызметкерлер жағдайына әсерін талқылағаннан кейін оны тағы бір аптаға ұзартуға бұйрық берді.
USAID-тің Конгодағы қызметкерлері сотқа жазбаша куәлік беріп, агенттік өткен айда ел астанасында болған ұрлық пен саяси толқулардан кейін жұмысшыларды өз бетімен қалдырғанын, нәтижесінде олар өз еркімен эвакуациялануға мәжбүр болғанын мәлімдеді.
Контекст
Бұған дейін Қазақстанда USAID агенттігі өз қызметін аяқтағанын хабарлаған видео тарады. Бұл роликте агенттік өз жұмысының қорытындыларын көрсетіп, ЛГБТ-қоғамдастық пен гендерлік теңдікті қолдау, журналистерге, белсенділерге және құқық қорғаушыларға қаржылай көмек бергенін айтады. Factcheck.kz редакциясы бейнежазбаны тексеріп, ақпараттың шындыққа жанаспайтынын анықтады.
