Интернеттегі алаяқтық жаңа деңгейге көтерілді, алаяқтар дипфейкті алдын ала жазылған видеоларда ғана емес, тікелей байланыс кезінде де пайдалана бастады. Енді ноутбук, уеб-камера және арнайы бағдарламалық қамтамасыз ету арқылы олар видеоқоңырау кезінде өз келбетін өзгертіп, адамдарды бұрынғыдан да оңай алдай алады. Бұл туралы SecurityLab 404 Media басылымына сілтеме жасап хабарлады.
Негізгі тұжырымдар мынадай:
- Дипфейк маскалар дайын бейнені (мысалы құжаттағы сурет) камерадағы бейненің үстіне қою арқылы жұмыс істейді. Бұл технология адамның жасын, жынысын немесе нәсілін өзгертіп береді.
- Алаяқтар көбіне романтикалық қарым-қатынас қалайтын адамдарды нысанаға алады, олар сенімді қарым-қатынас орнатып, әртүрлі сылтаумен ақша сұрайды.
- Қолданылатын құралдардың қатарында Amigo AI мен Magicam сынды бағдарламалар бар. Бұл қосымшалар қажетті фотоларды жүктеп, бейнеқоңырау барысында адамның бет-әлпетін дәл уақыт режиміне ауыстырады. Сапаны арттыру үшін экран айнасы, OBS Studio арқылы виртуалды камералар, сонымен бірге NDI Tools сияқты қосымшалар пайдаланылады.
- 2024–2025 жылдары дипфейктердің сапасы айтарлықтай артты.
- Романтикалық мақсаттағы алаяқтықтан бөлек, дипфейк технологиясы банктер мен криптобиржаларда жеке басын растау процедураларын айналып өту үшін де жиі қолданылып жүр.
- Алаяқтықпен күресетін SentiLink компаниясының мәліметінше, кейінгі жылда мұндай оқиғалар едәуір көбейген. Зерттеушілер дипфейк бет АҚШ-та кең таралған CashApp төлем платформасында тексерістен сәтті өткен мысалды көрсетті.
- Дипфейк тек қаржылық мақсаттағы алаяқтық үшін ғана емес, сонымен қатар саяси операциялар, жалған ақпарат тарату немесе компаниялардың ішкі процестеріне кедергі келтіру үшін де жасалады.
