ҚР Парламент Сенатының спикері Мәулен Әшімбаев елімізге ресми сапармен келген Ресей Фердерация кеңесінің басшысы Валентина Матвиенкомен кездесуде білім саласына қатысты бірқатар статистика келтірді. Factcheck.kz сайты спикердің мәлімдемелерін тексеріп көрді.
Мәлімдеме: Қазақстанда оқушылардың 41%-тен астамы орыс тілінде оқиды.
Мәулен Әшімбаев, Сенат төрағасы
Үкім: Жартылай шындық
ЖАРТЫЛАЙ ШЫНДЫҒЫ МЫНАДА: Ұлттық статистика бюросының мәліметі бойынша, қазіргі уақытта тек орыс тілінде 412 216 оқушы және аралас мектептерде орыс тілінде 685 891 оқушы білім алады (екеуін қосқанда 1 098 107 оқушы), ал жалпы білім беретін мектептерде 3 481 347 оқушы барын ескерсек, 31,5% оқушы орыс тілінде білім алуда.
Мәлімдеме: Мектептерде 21 мыңнан астам педагог орыс тілі мен әдебиеті пәнінен сабақ береді.
Мәулен Әшімбаев, Сенат төрағасы
Үкім: Жартылай шындық
ҚР Білім және ғылым министрлігінің бізге берген мәліметі бойынша, қазіргі уақытта орыс тілі мен әдебиетінен 23 725 мұғалім сабақ береді. Оның ішінде орыс тілді мектепте – 2269 мұғалім, аралас мектепте – 21 456 мұғалім.
Елімізде орысша сабақ беретін педагогтердің саны (орыс, қазақ және аралас мектептерде) – 147 375. Ал қазіргі таңда Қазақстан мектептерінде 366 666 педагог қызмет атқарады.
Мәлімдеме: Қазақстанда барлығы 5 мыңнан астам жалпы білім беретін мектеп жұмыс істейді. Бұл ретте 2 мыңға жуығы орыс тілінде оқытады.
Мәулен Әшімбаев, Сенат төрағасы
Үкім: Жалған және манипуляция
Ұлттық статистика бюросының мәліметінше, елімізде 7440 мектеп бар. Оның ішінде 1287 мектеп орыс тілінде оқытады.
Мәлімдеме: Орыс сыныптары бар немесе ішінара орыс тілінде оқытатын 2 мыңнан астам мектеп бар.
Мәулен Әшімбаев, Сенат төрағасы
Үкім: Жартылай шындық
Ұлттық статистика бюросының мәліметі бойынша, еліміздегі 7440 мектептің 2319-ы аралас тілде, яғни ол мектептерде орыс сыныбы бар және ішінара орыс тілінде оқытады.
