Халықаралық OP Stream операциясының нәтижесінде 38 елдің атсалысуымен полиция Kidflix атты уеб-сайтты бұғаттады. Еурополдың мәліметінше, бұл – әлемдегі ең ірі балалар порнографиясы сақталған платформа. Тек тергеу кезінде ғана сайтты 1,8 миллион педофил пайдаланған. Бұл туралы Deutsche Welle хабарлады.
Бавария қылмыстық полициясының вице-президенті әрі халықаралық операцияны басқарған Гвидо Лиммер: «Біз балалар порнографиясына қарсы ең үлкен соққылардың бірін жасадық. Кейінгі он жылдағы емес, бүкіл тарихтағы ең қуатты операциялардың бірі болды», – деді.
Оның айтуынша, платформаны шексіз пайдалану үшін адамдар 180 доллар төлеген. Сайтта балаларға қатысты сексуалды зорлық-зомбылықтың ауыр түрлерін көрсететін фото және видеолар бар.
Полиция 1400 күдіктіні анықтап, олардың 79-ын қамауға алды. Алайда тергеу жұмыстары әлі аяқталған жоқ. OP Stream операциясына Еуропалық Одақ елдерімен қатар, Албания, Жаңа Зеландия және басқа да елдердің құқық қорғаушысы қатысты. 10-23 наурыз аралығында 31 елде тінту жүргізілген.
Күдіктілердің үйінен мыңдаған дерекқор мен компьютерлер тәркіленді. dpa агенттігінің жазуынша, сайтты пайдаланып, материалдарды жүктегендердің арасында балаларға зорлық-зомбылық көрсеткендер де бар.
Еурополдың мәліметінше, операция барысында полиция жалпы 39 баланы құтқарып, қорғауға алды. Бұл іс бойынша тергеу 2022 жылдан бері жалғасып келеді. Тергеушілердің айтуынша, Kidflix платформасын 2021 жылы киберқылмыскерлер құрған. 2025 жылғы 11 наурызда Германия және Нидерланд полициясы платформаның серверін тәркіледі. Сол сәтте серверде балалар порнографиясына қатысты 72 000 видео сақталғаны анықталды.
