Қазір жасанды интеллект арқылы біреудің дауысын айнытпай салатын дипфейк жасау немесе жалған түбіртек құрастыру оп-оңай. Сондықтан OpenAI осы шабуыл түрлерінен қорғануға көмектесетін тағы бір стартапқа қаржы құйды. Бұл туралы TechCrunch хабарлады.
2 сәуірде Нью-Йорктегі Adaptive Security стартапы 43 миллион долларлық инвестиция алғанын хабарлады. Инвестицияны OpenAI-дің стартап қоры мен Andreessen Horowitz бірлесіп басқарады. Бұл — OpenAI-дің киберқауіпсіздікке жасаған алғашқы инвестициясы.
Adaptive Security платформасы ЖИ көмегімен жасалған жалған шабуылдарды модельдеп, компания қызметкерлерін қауіптерді тануға үйретеді. Мысалы сізге техникалық директорыңыздың даусына ұқсас адам хабарласып, растау кодын сұрауы мүмкін. Ал бұл шын мәнінде стартап генерациялаған жалған қоңырау болады. Платформа хабарламалар мен электрон хаттар арқылы да «шабуыл» жасап, ұйымның қай бөлігі әлсіз екенін анықтап, қызметкерлерді дайындайды.
Adaptive Security қызметкерді бір нәрсені «қате» жасауға итермелейтін адами факторға негізделген шабуыл түрлерін қолданады. Бұл шабуылдар «әлеуметтік инженерия» деп аталады. Олар қарапайым болса да, салдары ауыр. Мысалы 2022 жылы Axie Infinity ойыны жалған ұсыныстың кесірінен 600 миллион долларынан айырылды.
2023 жылы іске қосылған Adaptive-тің бүгінде 100-ден астам тұтынушысы бар. Компанияның негізін қалаушы әрі бас атқарушы директоры Брайан Лонгтың айтуынша, клиенттердің оң пікірі OpenAI-ді стартапқа қызықтырыпты. Ол жаңа қаржы инженерлерді жұмысқа алуға, өнімді жетілдіруге және ЖИ-ді теріс мақсатта қолданатындармен күресуге жұмсалады деді.
Adaptive Security — ЖИ қауіптерімен күресіп жатқан жалғыз стартап емес. Forbes дерегінше, Cyberhaven компаниясы қызметкерлердің ChatGPT сияқты құралдарға құпия ақпарат енгізуіне жол бермеу үшін 1 миллиард долларға бағаланып, жақында 100 миллион доллар қаражат алды. Ал дипфейктерді анықтайтын GetReal стартапы өткен айда 17,5 миллион доллар инвестиция тартқан.
