«Азат Еуропа/Азаттық радиосы» АҚШ Конгресі бөлген 2025 жылғы грантты алу мақсатында АҚШ Ғаламдық медиа агенттігімен (USAGM) соттасып жатыр. «Азаттық радиосының» жазуынша, бұл туралы медиакорпорация басшылығы 28 наурызда хабарлаған.
Бұған дейін АҚШ соты «Азаттық радиосының» USAGM үстінен түсірген шағымына қатысты оң шешім шығарған. Трамптың жарлығынан соң агенттік Конгресс бөлген қаржыны «Азаттық радиосына» беруді тоқтатқан. Медиа бұл шешімді заңсыз деп танып, сотқа жүгінді. Судья «Азаттық радиосын» қаржыландыруды тоқтатуға уақытша тыйым салды. Сот барысында USAGM агенттігі «Азат Еуропа/Азаттық радиосына» АҚШ Конгресі бөлген қаржының бір бөлігін беруге келіскен.
Ал 27 наурызда АЕ/АР агенттіктен гранттың толық көлемде ұзартылатынын ресми түрде растауды күтетінін мәлімдеді. Алайда 28 наурызға дейін бұл мәселе бойынша ешқандай хабар келмеген.
Контекст
15 наурызда АҚШ президенті Дональд Трамп жеті федералдық агенттіктің, оның ішінде «Америка ғаламдық медиа агенттігін» (USAGM) қысқарту туралы жарлыққа қол қойған. USAGM – «Америка дауысы», «Азат Еуропа/Азаттық радиосы» және «Азат Азия радиосының» бас ұйымы.
Өткен айда АҚШ-тың мемлекеттік тиімділік департаментінің (DOGE) жетекшісі, кәсіпкер Илон Маск бұл медиа ұйымдарды жабуды ұсынған.
«Азат Азия радиосының» президенті және атқарушы директоры Бэй Фанг бұл шешімді «диктаторларға жасалған сый» деп атады. Ал «Азат Еуропа/Азаттық радиосының» басшысы Стивен Капус «Иран аятоллалары, Қытайдың коммунистік басшылары, Мәскеу мен Минскідегі автократтар медианың 75 жылдан кейін жабылуын тойлайды» деп жазды.
Басты беттегі сурет Reuters порталынан алынды.
