ШҚО 30 қарашада уақытты екі сағат алдыға жылжытуды жоспарлап отыр ма?

WhatsApp мессенджерінде Instagram-дағы бір пікірдің скриншоты тарап жатыр, онда Шығыс Қазақстан облысының тұрғындарына 30 қараша күні сағат 23:00-де уақытты екі сағат алға жылжыту ұсынылғаны айтылған. Мәтінде бұл шешімді тұрғындардың өздері қабылдауы тиіс екені, өйткені мектеп, балабақша, емханалар мен ауруханаларда сауалнамалар жүргізіліп, барлығы бұл ұсынысты қолдағаны мәлімделеді.

Хабарлама нақты мәлімдеме емес, уақытты жылжытуға шақыру сияқты көрінгенімен, әрі мұнда үкім шығару орынсыз болса да, біз оның фактчекерлердің назарын аударуға тұрарлық деп санаймыз, себебі хабарлама адамдарды жаңылыстыруы мүмкін.

Азаматтар уақытты мемлекеттік органдардың ресми шешімінсіз өз бетінше өзгерте алмайтынын айта кету маңызды, ал бұл мәлімдеме ресми емес. Уақытты ауыстыру өңірдегі немесе елдегі барлық басқа процестерде де өзгерістер енгізуді талап етеді — мемлекеттік мекемелердің, көлік жүйесінің жұмыс кестесін өзгерту және т.б. Сағат тілін ғана жылжыту жеткіліксіз — бұл тұрғындардың өздерін шатастырады.

Белгілі нәрсе, бұл мәлімдеме өңірдің барлық азаматтарын шақыруға бағытталған, бірақ тек мессенджерлер арқылы тарату арқылы мұны жүзеге асыру қиынға соғады.

Сонымен қатар, жүргізілген сауалнамалар туралы мәлімдеме күмән тудырады. Егер сауалнамалар өткізілген болса, онда оларды нақты кім өткізгені және барлық облыста жүргізілді ме, жоқ па белгісіз. Ашық дереккөздерде бұл туралы ақпарат таба алмадық.

Қазір eGov mobile қосымшасында уақытты ауыстыруға қатысты ресми сауалнама жарияланғанын естеріңізге сала кетейік. Оны хабарламалар — сауалнамалар бөлімінен табуға болады.

Контекст

Сәуір айында, UTC+5 уақыт белдеуіне көшу туралы ресми шешім қабылданғаннан кейін, epetition.kz сайтында уақытты қайтадан бастапқы күйіне келтіруді талап ететін петиция пайда болды. Ол қажетті 50 мың қол жинады, бірақ қаралғаннан кейін Сауда және интеграция министрлігі бұл талапты қабылдамады.

Қазан айының соңында тағы бір петиция пайда болды, оның авторлары «Қазақстан Республикасының орталық және шығыс аймақтарында, соның ішінде Астана, Алматы, Шымкент қалаларында уақытты екі сағат алға жылжытып, электр энергиясын үнемдеуді» талап етті. Нәтижесінде ол модерациядан өтпеді. Қараша айында Астана мектептерінің чаттарында уақытты ауыстыруға байланысты сабақты 40 минутқа қысқарту туралы сауалнама тарала бастады. Қала білім басқармасы мұндай тапсырма бермегенін және сабақтың ұзақтығын қысқартуды ұсынбағанын хабарлады.