Дүйсенбі күні республикашыл конгрессмен Пол Госар туиттерінде АҚШ-тың бұрынғы президенті Барак Обаманың Иран президенті Хасан Роуханимен бірге түскен фотосын жариялады. Суреттің астына “әлем биліктегі осы адамдарсыз жақсырақ” деп жазды.
Бірақ Обама мен Роухани ешқашан жеке кездеспеген. Пол Госар жариялаған сурет арнайы бағдарламамен өңделген. Сурет 2011 жылы Обама мен Үндістан премьер-министрі Манмохан Сингхтың кездесуі кезінде жасалды.
Журналист Даниэль Медина Роуханидің әлі де билікте екенін айтып, Госардың жалған ақпарат тарату әрекетін айыптады.
“Ешкім бұл фотошоп емес екенін айтқан жоқ. Ешкім Иран президенті өлді деп айтқан жоқ. Ешкім Обама Роуханимен жеке кездесті деп айтқан жоқ” деп Госар суреттің жалған екенін айтып, сынағандарға туиттерде жауап берді.