Қанша медицина қызметкері шетелге кетті?

27 қазанда өткен мәжілістің пленарлы отырысында депутат Ғалымжан Елеуов Қазақстандағы медицина саласындағы кадрлар тапшылығы мен қызметкерлердің шетелге кетуі жайында сөз қозғап, депутаттық сауал жолдады. Factcheck.kz редакциясы депутаттың айтқанын тексеріп көрді.

Тайм-код: 2:25:04

Мәлімдеме: Қазіргі таңда медицина саласында 7,5 мыңға жуық кадр жетіспейді. Бұл әсіресе, анестезиолог-реаниматолог, акушер-гинеколог, дәрігер-лаборанттар және инфекционистер арасында байқалады.

Ғалымжан Елеуов, депутат

Үкім: Жартылай шындық

ҚР Денсаулық сақтау министрлігінің бізге берген мәліметі бойынша, 1 қазандағы жағдайға сәйкес медицина саласындағы кадр тапшылығы — 3947 маманды құраған. Әсіресе жалпы практикамен айналысатын дәрігерлер (525 адам), анестезиолог-реаниматолог (334 адам), терапевт (297 адам), акушер-гинеколог (233 адам), педиатр (197 адам) және инфекционистер (110 адам) жетіспейді.

Дәрігер мамандардың тапшылығы бойынша Қостанай облысы 477 бос орынмен көш бастап тұр. Одан кейін Ақмола — 338, БҚО — 298, Солтүстік Қазақстан — 295, Нұр-Сұлтан қаласы — 283, Маңғыстау — 277, Алматы облысы — 262 және ШҚО — 256 кадр тапшылығы байқалады.

Мәлімдеме: Тек соңғы 4 жылдың ішінде Қазақстаннан 4,5 мыңнан астам медицина қызметкері кетті [шетелге — ред.].

Ғалымжан Елеуов, депутат

Үкім: Жартылай шындық

ҚР Ұлттық статистика бюросының сыртқы көші-қон статистикасы бойынша, соңғы 4 жылда (2017-2020) 4260 медицина қызметкері шетелге кеткен.

Контекст

Stat.gov.kz сайтының мәліметінше, депутат айтқан 4 жылда (2017-2020) Қазақстанға 1415 медицина қызметкері келген. Оның ішінде, 2020 жылы — 233, 2019 жылы — 302, 2018 жылы — 396, 2017 жылы — 484 және 2016 жылы — 455 медицина қызметкері Қазақстанға қоныс аударған.

Жансерік Тілеухан
Журналист-фактчекер, медиа-тренер, СДУ түлегі, 2017 жылдан бері Factcheck Kazakhstan жобасында қызмет атқарады, "Qazaq Travel" компаниясында SMM маманы қызметін атқарған, MediaNet халықаралық журналистика орталығында және Irex Europe жобаларында медиа-монитор