Алмалы аудандық соты «Феминита» белсендісі Жанар Секербаеваны 10 күнге қамауға алды. Бұған дейін полиция белсендіні жаттығу залында ұстап әкеткен. Бұл туралы «Феминита» бастамасы хабарлады.
«Власть» жазуынша, сот Секербаеваға әкімшілік құқық бұзушылық туралы кодекстің 488-бабының 7-бөлігін бұзды деген айып таққан.
Секербаеваның серіктесі Анастасия Рощупкинаның айтуынша, оны 2024 жылғы 13 мамырда өткен марш үшін ұстаған. Сол кезде «Феминита» белсенділері бұрынғы Ұлттық экономика министрі Қуандық Бишімбаевқа үкім шыққаннан кейін акцияға шығып, оған өмір бойына түрме жазасын талап еткен еді. Маршқа шыққан белсенділер Гүлзада Сержан мен Гүлбақыт Өтебайға айыппұл салынған.
Секербаеваның адвокаты Ғалым Нұрпейісов сотта осы маршты ұйымдастырғаны үшін Гүлзада Сержанға айыппұл салынғанын айтып, ал Жанар Секербаеваның не себепті енді ғана жауапқа тартылып жатқанын сұрады.
«Бұл азаматша әкімдік органдарын, полиция қызметкерлеріне ескертпей, әдейі шеруге шықты. Онда қоғамдық тәртіп бұзылды, егер бірдеңе болғанда, біз оны білмес едік», — деп жауап берген полиция қызметкері.
Бұған дейін Жанар Секербаеваға «тіркелмеген немесе қызметі тоқтатылған не тыйым салынған қоғамдық, діни бірлестіктерді басқарды» деген айып тағылды. Сот оған 393 мың теңге көлемінде айыппұл салған.
Контекст
13 ақпанда қазақстандық ата-аналар одағының белсенділері «Феминита» тобының адам құқығы жөніндегі шарасына кіріп келіп, жиынға кедергі келтірген. Полиция алдымен Гүлзада Сержан мен Жанар Секербаеваны оқиғаға қатысты түсініктеме аламыз әкеткен. Бірақ оларға әкімшілік құқық бұзушылық бойынша іс қозғамақ болған.
14 ақпанда Қазақстандық ата-аналар одағы «Феминита» бастамасының тағы бір жабық іс-шарасына кедергі келтіріп, шырқын бұзды. Белсенділердің жазуынша, Бағила Балтабаева бастаған бір топ адам шара өтіп жатқан жерге келіп, есікті сындырмақ болған.
Басты беттегі сурет «Власть» басылымынан алынды.
