АӨК-ке жоспарланған соманың 80%-і бөлінгені рас па?

17 ақпанда өткен Сенат отырысында депутат Ақылбек Күрішбаев агроөнеркәсіптік кешенді дамытудың 2017–2021 жылдарға арналған мемлекеттік бағдарламасы туралы бірнеше дерек келтірді. Factcheck.kz депутат мәлімдемесін тексеріп көрді.

Біріншіден, Агроөнеркәсіптік кешенді дамытудың 2017-2021 жылдарға арналған мемлекеттік бағдарламасын жүзеге асырудың 4 жылы ішінде салаға 2 триллион теңгеден астам қаражат жіберу жоспарланғанымен, іс жүзінде қажетті соманың 80%-і ғана бөлінген.

Ақылбек Күрішбаев

Үкім: Шындыққа жақын

Үкімет қаулысына сай, Агроөнеркәсіптік кешенді (АӨК) дамыту мемлекеттік бағдарламасын 2017 – 2021 жылдары іске асыруға республикалық бюджеттен көзделген жалпы шығыс 1 трлн 829 млрд 500 млн теңгені құрайды. Ауыл шаруашылығы министрлігінің бізге берген мәліметінше, бағдарламаны жүзеге асыруға республикалық бюджеттен жалпы 1 трлн 334 млрд 400 млн теңге бөлінген. Бұл жоспарланған соманың 73%-і, депутат келтірген деректегі 80%-тен де аз.

Былтыр да ҚР Ауыл шаруашылығы экс-министрі Сапархан Омаров Қазақстанда АӨК 70-80%-ке қаржыландырылатынын хабарлады.

Дұниежүзілік сауда ұйымының (ДСҰ) шеңберінде Қазақстан ауыл шаруашылығы саласын жалпы ауыл шаруашылығы өнімі құнының 8,5% деңгейінде субсидиялауға құқылы. Десе де, республикадағы мемлекеттік қолдау көп жылдар бойы 4-5%-ті құрап отыр, бұл ЕАЭО-дағы негізгі серіктестеріміз – Ресей мен Беларусь елдерінен 1,5-2 есе аз.

Ақылбек Күрішбаев

Үкім: Шындыққа жақын

2018 жылы жалпы ауыл шаруашылығы өніміндегі субсидия үлесі 1%-ті құраса, 2019 жылы бұл көрсеткіш 7,85%-ке жеткен. Ал ЭЫДҰ мәліметінше, Қазақстанда 2018-2020 жылдары бұл мән орта есеппен 4%-ті құраған. ДСҰ шеңберінде Қазақстан ауыл шаруашылығы саласын жалпы ауыл шаруашылығы өнімі құнының 8,5% деңгейінде субсидиялауға құқылы екені рас (бұл дамыған елдер үшін 5% және дамушы елдер үшін 10% құрайды). 2018-2021 жж. жалпы ауыл шаруашылығы өнімі құнындағы субсидия төмендегі инфографикада:

Контекст

ЭЫДҰ дерегінше, Ресейде ауыл шаруашылығын қолдауға 2014 жылдан бастап ауыл шаруашылығы ЖІӨ-нің 9%-тен 13%-ке дейін қаржы бөлінген. 2018-2020 жылдары ауыл шаруашылығын субсидиялау орташа жылдық шамамен 9% құраған.

ДСҰ баяндамасына сай, 2015 жылы Беларусь ауыл шаруашылығын қолдау үлесі ауыл шаруашылығы өнімінің жалпы құнының 14-15%-ін құраған.