16 ақпанда өткен Мәжілістің жалпы отырысында «Ақжол» фракциясының депутаты Ғани Хамзин Қазақстандағы Covid-19 ПТР-тестінің бағасын шетелдікімен салыстырды. Factcheck.kz депутат мәлімдемесін тексеріп көрді.
Айта кету керек, азаматтардың өз еліне кіруіне кедергі келтіретін мұндай ережелер біздің көршіміз Ресей мен Украинада жоқ. Бұл елдердің азаматы еш қиындықсыз елге оралып, өз елінде ПТР-тест тапсырады.
Ғани Хамзин
Үкім: Шындық (ҚР ҮАК шешімі бойынша енгізілген өзгерістерге байланысты мәлімдеме маңыздылығын жойды)
17 ақпаннан бастап Қазақстанның коронавирустық инфекцияның таралуына жол бермеу жөніндегі ведомствоаралық комиссиясы ҚР азаматы COVID-19-ға қарсы вакцинаның толық курсын алса немесе вакцинаның екінші компонентін алғаннан 6 айдан аспаса, елге кірерде ПТР-тест көрсетуге міндеттелуі тоқтатылды.
Заң Ғани Хамзин бас санитарлық дәрігердің 2022 жылғы 13 қаңтардағы қаулысындағы қазақстандықты елге кірерде теріс ПТР-тест анықтамасына міндеттеу елдің Конституциясына қайшы келетінін айтқан мәлімдемесінен кейін жаңартылды.
Басқа елдерде қалай?
Ресей азаматы шетелден оралған кезден бастап 3 күн ішінде COVID-19 ПТР-тестін тапсыруы керек. Бір жыл ішінде вакцина алған немесе келгеннен кейін соңғы 6 ай ішінде коронавируспен ауырған Ресей азаматы ПТР-тест тапсырудан босатылған.
Украина азаматына ПТР-тест тапсырмаc үшін вакцинаның бірінші дозасын алғанын растайтын «063-О» құжатын немесе ДДСҰ мақұлдаған вакцинаның толық курсын алғанын растайтын сертификат көрсетсе жеткілікті.
Қырғызстандықтар вакцинация мәртебесіне қарамастан, елге келмес бұрын міндетті түрде коронавирусқа ПТР-тест тапсыруы қажет.
Өзбекстанға “сары” және “қызыл” аймақтардан келетін Өзбекстан азаматтары рейске тіркелерде 72 сағат ішінде тапсырған ПТР-тестінің теріс нәтижесі көрсетілген анықтаманы ұсынуы тиіс.
Түркіменстан азаматтары елге ораларда рейске тіркелу кезінде 72 сағат ішінде тапсырған ПТР-тестінің теріс нәтижелі құжатын көрсетуі керек.
Осы ережеге байланысты қазақстандықтарға қаржы жағынан ауыртпалық түседі. Мысалы, Қазақстанда ПТР-тесті 7000 теңге тұрады, ал шетелде оның бағасы 20 доллардан 150 долларға дейін барады. Демек, 5 адамнан тұратын отбасы ПТР-тест үшін 750 доллар (курс 429,1) немесе 321 825 теңге төлесе, Қазақстанда 35 000 теңге төлер еді.
Ғани Хамзин
Үкім: Шындыққа жақын
ҚР Бәсекелестікті қорғау және дамыту агенттігінің дерегіне сай, ПТР-тест бағасы 4935-7400 теңге аралығында. Тест қорытындысын тездетуге қосымша ақы алынатындықтан, бағасы 7400 теңгеден асуы мүмкін. Қазақстанның ең ірі әуе компаниясы Air Astana-ның сайтында шетелдік қалалардың бірнеше клиникасының ПТР бағасы жинақталған, мұнда ол кем дегенде 18 доллардан (Өзбекстан) 350 долларға (Ұлыбритания) дейін жетеді.