Нұр-Сұлтанда 20 шақты әйел жәрдемақыны өсіруді, баспана мәселесін шешуді талап етті

1 сәуірде Нұр-Сұлтанда бір топ ана қалалық әкімдік маңындағы Конгресс хол сарайының алдына жиналып, билікке бірнеше талап айтты: бала санына қарамастан отбасындағы әр балаға 42 500 теңге жәрдемақы тағайындау, көп балалы отбасыларды, мүгедек бала тәрбиелеп отырған аналарға арзан бағамен несиеге баспана беру және өзге мәселелер. Бұл туралы Азаттық радиосы хабарлады.

Нұр-Сұлтанда 20 шақты әйел жәрдемақыны өсіруді, баспана мәселесін шешуді талап етті
Нұр-Сұлтан қаласы әкімдігіне жақын Конгресс хол маңында әлеуметтік көмекті көбейтуді талап етіп, наразылық өткізіп тұрған әйелдер. 1 сәуір 2021 жыл.

“Үй кезегі неге ақырын жылжиды? Баспана мәселесі шешілсін!”, “Отбасы шағын мемлекет. Отбасы жоқ болса, мемлекет те жоқ” деген жазуы бар плакат ұстаған әйелдер қаладағы эпидемиологиялық ахуалды ескеріп, қашықтық сақтап тұрды.

“Отбасы саясаты мәселелеріне өте аз көңіл бөлінеді, оған астанада болған қайғылы оқиға – бір отбасында бес баланың өрттен қаза болуы да дәлел” делінген президент Қасым-Жомарт Тоқаев, парламент пен премьер-министр Асқар Маминге бағытталған хатта.

Акцияға келгендердің бірі Мөлдір Сәрсенбаева мемлекеттің баспана алу тәртібін қиындатып жібергенін айтты. “Біз Конституция баптарын (25-бап) алға тарта отырып, тұрғын үй қорындағы баспаналардың қолжетімді бағамен үйге мұқтаж отбасыларға берілгенін қалаймыз” деді ол. Наразылар бала туылған кезде берілетін бір реттік төлемді 1,5 млн теңгеге дейін көбейту қажеттігін, ол баланың білім алуына негізделуі керек дегенді айтты.

Наразылардың алдына Нұр-Сұлтан қаласы әкімінің орынбасары Дәурен Бабамұратов шықты. Ол шараның рұқсат етілмегенін алға тартты. Шенеунік бұл әйелдердің жағдайынан хабардар екенін, олардың баспана жайлы шағымдарын әкімдіктің қарастырып жатқанын айтып өтті. Ол баспанаға мұқтаж азаматтарға үй кезек арқылы берілетінін айтты.

Бұл әйелдер ақпан айының соңында және наурыз айының басында да баспана мәселесін шешуді талап етіп, әкімдікте түнеген. Сол кезде санитария мамандарының эпидемиологиялық ахуалды алға тартып, оларды әкімдіктен қуғаны да хабарланды.

Төлепберген Маликов. Сулейман Демирел университетін журналистика мамандығы бойынша тәмамдаған. Азаттық радиосының Прагадағы бас штабында тәжірибеден өткен. 2018 жылдан бастап Factcheck.kz сайтында жұмыс істейді.

Factcheck.kz