WhatsApp мессенжерінде Kaspi.kz қосымшасын қолданушылар арасында аударым сервисін тоқтатқаны және онлайн банкиңге салған ақшаңыз банк есебіне өтетіні туралы ақпарат тарап жатыр. Factcheck.kz бұл ақпараттың қаншалықты рас екенін тексерді.
Үкім: Фейк
Kaspi.kz-тің ақпаратына сай, қазір терминал мен банкоматтар арқылы ақша толтыруға болады, ешқандай комиссия алынбайды. Бір күнде аударуға болатын сома шегі — бір миллион теңге. Онлайн аударым да тұрақты жұмыс істеп тұр. Мессенджерде тараған хабарламадағы “Kaspi-ге салған ақшаңыз банк есебіне өтеді”, “Тек онлайн-дүкен істеп тұр” деген ақпараттың барлығы жалған.
Жалпы Kaspi.kz жайында шындыққа жанаспайтын ақпарат жиі тарайды. Мысалы, 2020 жылдың соңында да хакерлер Kaspi.kz-ке шабуыл жасап, 78,9 миллион теңге ұрлады деген хабарлама WhatsApp-та тараған. Банк ақпаратты жоққа шығарып, ақау техникалық себептерден болғанын айтты. Cонымен қатар өткен жылы Kaspi.kz алаяқтар туралы ескерту жасап, банктің ресми аккаунтында берілген ақпаратқа ғана сенуге шақырды.
